ឯកឧត្តម លន់ លឹមថៃ បើកសន្និបាតបូកសរុបលទ្ធផលការងារប្រចាំឆ្នាំ២០១៥ និងលើកទិសដៅសម្រាប់ឆ្នាំ២០១៦
26-January-2016 | ដោយ មួយឡា
កំពង់ចាម៖ នាព្រឹកថ្ងៃទី ២៥ ខែមករា ឆ្នាំ២០១៦ នៅសាលប្រជុំសាលា ខេត្តកំពង់ចាមបានប្រារព្ធពិធីសន្និបាតបូកសរុបលទ្ធផលការងារប្រចាំឆ្នាំ ២០១៥ និងលើកទិសដៅការងារសម្រាប់ឆ្នាំ ២០១៦ ក្រោមអធិបតីភាព ឯកឧត្តម លន់ លឹមថៃ អភិបាលខេត្តកំពង់ចាម។
ពិធីនេះមានការចូលរួមពី ឯកឧត្តម លោកជំទាវ ជាអភិបាលរងខេត្ត កងកម្លាំងប្រដាប់អាវុធទាំងបី (ស្នងការនគរបាល អាវុធហត្ថ បញ្ជាការសឹករង) មន្ទីរអង្គភាពជុំវិញខេត្ត លោកអភិបាល ក្រុង-ស្រុកទាំង១០ ប្រធានក្រុមប្រឹក្សាក្រុងស្រុក និង មេឃុំ-ចៅសង្កាត់ ព្រមទាំងនាយប៉ុស្តិ៍នគរបាលរដ្ឋបាលឃុំ សង្កាត់ទូទាំងខេត្តចូលរួមផងដែរ។
បន្ទាប់មក លោក ហាន កុសល នាយករដ្ឋបាលសាលាខេត្តកំពង់ចាម បានអាននូវរបាយការណ៍ស្ដីពីការងារបូកសរុបលទ្ធផលរដ្ឋបាលដែនដី ក្នុងខេត្តកំពង់ចាម ប្រចាំឆ្នាំ២០១៥ ដោយផ្ដោតលើការងារសន្តិសុខសណ្ដាប់ធ្នាប់សាធារណៈ ការងារអភិវឌ្ឍន៍ ការបំរើសេវាសាធារណៈជូនប្រជាពលរដ្ឋ និងសកម្មភាពរបស់ថ្នាក់ដឹកនាំជាតិចុះមូលដ្ឋាន និងបញ្ហាប្រឈមក៏ដូចជាសំណូមពរ ជូនអង្គសន្និបាតស្ដាប់រួចមក ឯកឧត្តម លន់ លឹមថៃ អភិបាលខេត្តកំពង់ចាម ក៏បានមានមតិ ទៅកាន់អង្គសន្និបាតថា ឯកឧត្តម សូមកោតសរសើរចំពោះការចូលរួមកិច្ចប្រតិបត្តិការរបស់អាជ្ញាធរគ្រប់លំដាប់ថ្នាក់ ដែលខិតខំប្រឹងប្រែងក្នុងការបង្ក្រាបរាល់បទល្មើសមិនឲ្យកើតមានជាទ្រង់ទ្រាយធំ ថ្វីត្បិតតែវានៅមានបន្តិចបន្តួច តែយើងត្រូវរួមគ្នា បង្ក្រាបនិងស្រាវជ្រាវ ស្វែងរកមុខសញ្ញា ឈានដល់ការចាប់ខ្លួនយកមកផ្ដន្ទាទោស ឯកឧត្តមក៏បានសំណូមពរ ដល់អង្គសន្និបាត ពិសេសអាជ្ញាធរ ស្រុកក្រុង ឃុំសង្កាត់ ត្រូវបន្តការផ្សព្វផ្សាយគោលនយោបាយភូមិឃុំមានសុវត្ថិភាព ធ្វើការបង្ក្រាបល្បែងស៊ីសងគ្រប់ប្រភេទ មិនឲ្យកើតមាននៅមូលដ្ឋាន ហើយបន្តការបំផុសចលនាប្រជាពលរដ្ឋគោរពច្បាប់ចរាចរណ៍ផ្លូវគោកថ្មី ហើយឲ្យម្ចាស់យានយន្តត្រូវរួសរាន់បំពេញឯកសារឲ្យបានគ្រប់គ្រាន់ជៀសវាងរងនូវការផាកពិន័យ នាថ្ងៃទី១៥ ខែមីនា ឆ្នាំ២០១៦ខាងមុខនេះ ។
ឯកឧត្តមក៏បានជំរុញឲ្យគ្រប់រដ្ឋបាលស្រុកក្រុង ឃុំសង្កាត់មេត្តារៀបចំបង្កើតនូវបច្ចេកវិទ្យាព័ត៌មានដូចជា (ហ្វេសបុក វ័តសអាប់ឡាញឃ៍) ជាដើម ដើម្បីតាមដាននូវរាល់ព័ត៌មានរបស់ថ្នាក់ជាតិ ថ្នាក់ក្រោមជាតិ ហើយស្រុកក្រុង ឃុំសង្កាត់ មានភាពងាយស្រួលផ្ញើព័ត៌មានទាន់សភាពការណ៍ បានមុននិងរៀបចំឯកសាររបាយការណ៍ជាផ្លូវការតាមក្រោយ។
បន្ទាប់មកឯកឧត្តមអភិបាលខេត្តក៏បានថ្លែងនូវអំណរគុណចំពោះសមាជិកសមាជិកា នៃអង្គសន្និបាត ដែលចំណាយពេលចូលរួមក្នុងកិច្ចប្រជុំនាពេលនេះ ប្រកបដោយការទទួលខុសត្រូវខ្ពស់៕ ដោយ មែន កំសត់
ចំនួនអ្នកទស្សនា
- ថ្ងៃនេះ3191
- ម្សិលមិញ2941
- សប្តាហ៍នេះ6141
- ខែនេះ26191
- ឆ្នាំនេះ1009411
- សរុប20236857